चीन र साथ गोतियौरी झगड़ा

चीन दुश्मन नय चिकै, चीन होलौं कजिया करै वाला गोतिया। वहा गोतिया जे बेटी र बिहा भड़काबै , नयका जमाय क तोराह शिकायत करी का खुश हो जाय। बाराती में जा करी क जन्वासा में तकिया आरो तोशक पर तरकारी र झोर गिरा करी क हो हल्ला करै वाला गोतिया।

खाली बीहा शादी में नय, बाकी दिन भी जेकरs दिमाग म खाली खुराफात हूवा, वहा चि कै चीन। खेत पथार म जा करी क भोरे भोर कोदारी स आड़ काटी का अपना हिस्सा बढ़ाबै म जेकरा स्वर्ग जैनह सुख मिलै, बुझी ला चीन वहा गोतिया । आड़ काट तs पकड़ाबै पर आरो झगड़ा कर थौंह कि ए ज़मीन ता हमरे ची कै । फलां अमीन गड़बड़ कर क़ छैलई, फेरू सा नापी करवा के देखी ले। हम्मा ई बटवारा मानै वाला नाय छी, फेरु स पंचैती करवा ले। 

 

ऐन्हs गोतिया जैन्ह देश स निपटें म गोतियोरी पेंच सा काम करै ल पड़ तय । मार पीट करी का बदनामी सा जादे कुछु नय मिले वाला छै

। दू चार मैन्हा टोका चाली बंद , बेटा र बड्डे में ओकरा नाय बोला बा, सीधा लाइनपर आबी जै तोंह। बाकी दुनिया बदली जाय, तों गोतिया नय बदल स कै छ। एकरे बास्त ओकरा सा झगड़ा बढ़ा करी के कोय फैदा नय। आरो केकरो से पंचैयी करवा का आरो घटा, से बाहरी आदमी स त एक दम बची के रहना छै।

कैसनो चीकै अपने चीकै । ए बात मन म रहs, त सब चीज धीरे धीरे सब अपने आप ठीक हो जै तै। वहा आड़ काटे वाला गोतिया बाराती में सबसे आगे नागिन डांस कर थौंह , बस कनी टा धीरज रखै र काम छै।

 हिंदी चीनी गोतियौरी भाय भाय।।