Family Man season 1 : Synopsis

After too much hoopla and buzz around Family man 2, I thought why to miss the party. But there was a small issue.. I hadn't watch season 1. So I decided to watch family man season 1 to bring myself to speed. Here is a quick ready reckoner for those who want to watch season 2 but haven't seen season 1.

,.........,......................................................

Main hero hai ek north indian jisko kuch bhi karke sarkaari job mein hi rahna hai. Chahe naukri mein paise ho na ho.. bechara ek data analyst hai lekin kaam commando, navy seal aur James bond sabka kaam karta hai, aakhir naukri jo bachani hai.. Ladka intelligent tha isiliye South Indian ladki pata li.. ab ro raha hai.. biwi bhav nahin deti.. Bechare sarkaari naukri ke chakker mein kahan Kandhar Quetta mein jaan ki baazi laga raha hai, aur Biwi ka Aati kya Lonavala chal raha hai peeth peeche. North Indian ki aisi kismat ki biwi ka chakkar bhi ek marathi manush se hi hai.. Biwi ne hero ko etna mentally pareshan kar rakha hai ki khud ki mental health consultant ban gayi hai..

Hero ke do bachche hain.. Shakal se to pata nahin lagta lekin jis tarah se baap ki hamesha bajate rahte hain lagta hai apni maa per gaye hain.. Ab biwi sunti nahin to bachche kya bhav denge.. bechara kabhi kashmir bhi jaana ho to ek baar bhi family nahin kahti ki saath jaayenge. Udhar bhi jaaker hero ki ek purani kashmiri flame se mulaqat ho jaati hai jisper south indian wali se pahle try maara tha.. lekin finally kashmiri apple ji jagah uski kismat mein medu vada rasam hi likha ho to kya kare bechara .

Ek villain hai Kerala ka engineer naam hai Moosa aur uski ek maa bhi hai.. moosa dange ka victim hai, lover boy hai.. maa ko pyar karta hai.. maa ka badla lena chahta hai.. lekin brutal bhi ho sakta hai.. hospital bed per hi nurse ko pata kar dikha deta hain ki bhai saab lady killer hai.. poora poster boy villain hai.. writer bas animal lover wala angle daalna bhool gaya nahin to ekdam perfect villain ban jaata..

Baaki life mein jitne bhi problem hai ek baat achchi hai. Dushman bevkoof mile hain hero ko.. terrorist dikhte hain terrorist jaise.. dekhte hi pahchaan lo ki are saala yehi to hai woh CIA ka most wanted. Job but aasan hi hai, koi information chahiye, office mein ek fancy computer ke search engine mein likho mil gayi information. Boss bhi aisa mila jo koi order nahin deta .. bilkul waisa wala boss jo kahe ki kuch bhi karo bas mujhe har mail mein CC mein rakhna aur beech beech mein thank you bol dena. 

Etni problems hai Hero ke paas to help karne ke liye kuchh colleagues bhi hain.. bas problem yahi hai unko bhi har baat hero bataye tabhi kar paate hain.. apna koi input nahin.. har nayi lead lead actor ko hi milti hai.. Baaki apne aspirants wale Sandeep bhiaya bhi dikhte last mein.. Idhar bhi koi khaas kismat badalti nahin hai unki.. wohi tragic hero wala kaam karte hain. Ek difference hai.. Aspirants mein gyan ki gas maarte rahte hain, idhar gas se hi marte hain shayad.

‌Baaki phir to wohi hai Family man mein .. poora family meal hai .. sab ke liye kuch na kuch jaroor hai.. CID fans ko lagega ki kahin kuch script unke wale writer ne to nahin likhi aur 24 ke fans ko lagega ki apna Tiwari kisi bhi angle se Jack baur se kam nahin hai.. aur ultra progressive and humanist audience ke liye ek achcha aadmi bhi hai . Aadmi hoon aadmi se pyar karta hoon mein believe karne wala.. lekin bechara apni izzat bachane ke liye poori Delhi ki saat pushton ki Lanka lagane ke liye taiyaar hai.. agar aise hote hain bhale aadmi to phir Moosa to poora Greek god hai.. ab jab etna padh hi liya to dekh hi lo season 1. Waise bhi idhar timepass hi kar rahe ho aur woh bhi timepass hi hai..